Inspektorati Kombëtar i Mbrojtjes së Territorit ka nisur një aksion të gjerë ndaj bizneseve dhe banesave të vendosura përgjatë aksit kombëtar Qafë Thanë – Kapshticë, me qëllim lirimin e hapësirës pranë rrugës.
Drejtori i IKMT Korçë, Edi Bitri, ka bërë të ditur se të gjitha subjektet që kanë rrethime apo ndërtime brenda distancës 6 metra nga karrexhata, duhet t’i heqin ato brenda afatit të përcaktuar. Në të kundërtën, do të përballen me gjoba që shkojnë deri në 5 milionë lekë të vjetra.
Sipas tij, përgjatë këtij segmenti janë evidentuar 377 biznese që duhet të kryejnë prishjen vullnetarisht, përndryshe ndërhyrja do të bëhet nga vetë IKMT.
Ky aksion është pjesë e masave për zbatimin e ligjit dhe lirimin e hapësirave publike përgjatë akseve kombëtare, të cilat lidhen drejtpërdrejt me sigurinë rrugore.
