Korça renditet e dyta në vend për përqindjen e familjeve që kanë kompjuter në banesë, duke arritur në 33.9%, sipas të dhënave të Cens 2023. Në krye të listës qëndron Tirana me 49.3%, ndërsa pas Korçës vijnë Saranda (30.2%), Durrësi (29.2%), Shkodra (28.5%) dhe Shijaku (27.5%).
Shifrat tregojnë një hendek të madh midis bashkive të mëdha dhe zonave të vogla ose të thella rurale. Në disa prej tyre, si Selenica (5.8%), Memaliaj (6.1%), Finiqi (7.8%) dhe Roskoveci (8.0%), numri i familjeve me kompjuter është minimal, duke reflektuar prapambetje të theksuar digjitale.
Sipas ekspertëve, ky ndryshim lidhet ngushtë me nivelin e të ardhurave, aksesin në internet dhe përfshirjen në ekonominë digjitale. Zonat urbane, ku jetojnë më shumë të rinj dhe ku infrastruktura është më e zhvilluar, shënojnë përqindjet më të larta. Ndërkohë, në bashkitë e vogla dhe rurale, mungesa e njohurive teknologjike, emigracioni dhe interneti i kufizuar e bëjnë të vështirë përdorimin e pajisjeve kompjuterike.
Specialistët theksojnë se pajisja me kompjuter në familje është thelbësore për arsimin online, punën në distancë dhe aksesin në shërbime publike elektronike, ndërsa mungesa e saj thellon pabarazitë sociale dhe kufizon zhvillimin e komuniteteve.
Monitor.al
