Në repartin e urgjencës së Spitalit Rajonal të Korçës nuk është shënuar ndonjë fluks i shtuar vizitash për shkak të virozave. Burime pranë këtij reparti bënë të ditur se çdo ditë regjistrohen mesatarisht nga 50 deri në 60 vizita, një numër që konsiderohet normal edhe nga vetë mjekët.
Situata paraqitet e njëjtë edhe në repartin e pediatrisë, ku numri i vizitave mbetet i pandryshuar, ndërsa vetëm në pak raste ka pasur pacientë të shtruar.
Mjekët këshillojnë që, për shkak të temperaturave të larta në këtë periudhë, qytetarët të tregojnë kujdes me ushqimet që konsumojnë, duke zgjedhur vetëm produkte të freskëta dhe të ruajtura në kushte të përshtatshme.
