Mbi 95 familje të lagjes 18 në qytetin e Korçës i janë drejtuar me një kërkesë zyrtare Bashkisë së Korçës për të kërkuar rikthimin e ujitjes në hapësirat e gjelbra dhe rehabilitimin e një godine të amortizuar.
Sipas banorëve të këtij blloku pallatesh, mungesa e mirëmbajtjes dhe e ujitjes ka bërë që lulishtet pranë banesave të tyre të thahen. Krahas kësaj, një shqetësim madhor mbetet gjendja e një godine të vjetër dhe të braktisur në këtë zonë. Ata shprehen se ky objekt është kthyer në një burim të rrezikshëm ndotjeje dhe në një vatër infeksionesh për shkak të mbetjeve të grumbulluara ndër vite, duke ndikuar drejtpërdrejt në cilësinë e jetesës dhe shëndetin e komunitetit.
Reagimi i Bashkisë së Korçës
Pas kërkesës me firma nga komuniteti dhe interesimit të ngritur për këto problematika, përfaqësues të Bashkisë së Korçës kanë reaguar duke premtuar zgjidhje. Institucioni vendor ka bërë të ditur se do të ndërhyhet për të mundësuar zgjidhjen e problematikës së ujitjes për hapësirat e gjelbra.
Gjithashtu, bashkia ka garantuar se do të merren masat e nevojshme për pastrimin dhe dezinfektimin e godinës së braktisur, me qëllim eliminimin e rrezikut që ajo paraqet për banorët e lagjes 18.
Foto: Bufi i Urtë
