Përgatitja e zahireve të dimrit mbetet një traditë e gjallë në fshatrat e Pogradecit, duke u kthyer njëkohësisht në një ofertë të kërkuar kulinare për vizitorët vendas dhe të huaj. Në fshatin Çeravë, Viola Muçllari vijon të ruajë recetat e trashëguara brez pas brezi, të cilat sot po gjejnë vend gjithnjë e më shumë në menutë e restoranteve të rajonit.
Trashëgimia e amvisave në fshatin Çeravë
Prej ditësh, Muçllari është e angazhuar me përgatitjen e produkteve artizanale sipas mënyrës tradicionale që ka mësuar nga gjyshja dhe nëna e saj. Ajo thekson se procesi kërkon përkushtim dhe respektim të rreptë të rregullave të tharjes e përpunimit natyral.
“Petka, dromka ose rosnica. Trahana me kos, trahana me perime, reçelra, komposto. Të gjitha hapen me dorë, thahen në diell, por jo në kushtet e diellit që të mos zbardhen. Nga familjet tona, kur vinte korrik-gushti, përgatitej zahireja. Gjyshja ruante vezët e fshatit. Ruhet e trashëgohet. Të huajt janë kuriozë si ruhen, bëhen në mënyrë artizanale”, tha ajo.
Kërkesa e lartë e vizitorëve për kulinarinë autentike
Kjo traditë nuk mbetet më vetëm brenda mureve të shtëpive në zonat rurale të juglindjes. Sipas operatorëve turistikë, kulinaria tradicionale është kthyer në një nga arsyet kryesore pse udhëtarët zgjedhin Pogradecin dhe pikat përreth.
Operatori turistik Elton Shkullaku shprehet se vizitorët kërkojnë shijet vendase të bëra me dorë. “Turistët janë për gjërat tradicionale të zonës tonë, si pula me petka, me dromka. Kanë trahananë e ëmbël dhe të kripur. Janë të interesuar për t’i provuar. Amvisat i bëjnë me duart e veta, 80% të gjërave i prodhojmë vetë”, u shpreh ai.
Prania e këtyre gatimeve vihet re gjithashtu në Pazarin e Vjetër të Korçës, duke dëshmuar se recetat tradicionale mbeten një vlerë thelbësore e trashëgimisë dhe identitetit kulturor në mbarë qarkun.
