Policia e Shtetit ka arrestuar në Durrës 50-vjeçarin Gentian Lika, i shpallur në kërkim ndërkombëtar nga autoritetet italiane për të vuajtur dënimin me 6 vite burgim për veprën penale të trafikimit të narkotikëve të kryer në bashkëpunim.
Ndalimi i tij u bë i mundur në kuadër të fazës së radhës të operacionit policor të koduar “FAST”. Sipas njoftimit zyrtar të policisë, lokalizimi dhe identifikimi i 50-vjeçarit të lindur në Kavajë u realizua falë bashkëpunimit mes Sektorit për Kërkimin FAST Albania në Drejtorinë e Forcës së Posaçme Operacionale dhe Drejtorisë Vendore të Policisë Durrës.
Vendimi i gjykatës italiane dhe procedurat e ekstradimit
Shtetasi shqiptar ishte shpallur në kërkim ndërkombëtar pas vendimit të dhënë nga Gjykata e Apelit e Romës në mars të vitit 2025, e cila e ka dënuar atë me vendim të formës së prerë. Aktualisht, Interpol Tirana, në koordinim të ngushtë me homologët italianë, po ndjek të gjitha procedurat e nevojshme ligjore për ekstradimin e 50-vjeçarit drejt Italisë, ku pritet të vuajë dënimin e dhënë nga drejtësia e vendit fqinj.
