Agjencia e Mbikëqyrjes Policore (Rajoni Elbasan-Korçë) ka ekzekutuar urdhrin e Prokurorisë për zbatimin e vendimit të Gjykatës së Apelit të Përgjithshëm ndaj një punonjësi policie në Korçë.
Bëhet fjalë për J. R., me detyrë Oficer i Patrullës së Përgjithshme në Komisariatin e Policisë Korçë, i cili është vënë nën masën e sigurisë “Arrest në shtëpi”, për shkak të dyshimeve për përfshirje në një aksident rrugor me pasoja.
Ngjarja ka ndodhur më 3 mars 2025, në aksin Hoçisht–Bilisht, ku efektivi J. R. dyshohet se ka shkaktuar një aksident, duke plagosur qytetarin D. Gj.. Pas aksidentit, ai është larguar nga vendi i ngjarjes pa i dhënë ndihmë të plagosurit dhe pa njoftuar autoritetet.
Ai akuzohet për tre vepra penale:
• “Mosdhënia ndihmë”
• “Largimi nga vendi i aksidentit”
• “Shkelja e rregullave të qarkullimit rrugor”
Hetimet ndaj oficerit të policisë vijojnë në bashkëpunim me organet përkatëse.
