Për vitin e dytë rradhazi, qyteti i Pogradecit ka mirëpritur festën e koranit, një event që promovon jo vetëm kulinarinë, por edhe traditat dhe biodiversitetin e liqenit të Ohrit. Ky peshk endemik, i njohur si “mbreti i liqenit”, është pjatë e preferuar e turistëve dhe një pjesë e rëndësishme e historisë kulinare të qytetit. Gjatë festës u zhvilluan ekspozita fotografike të peshkimit në Pogradec, demonstrime gatimi të specialiteteve me koran, hedhja e rasatit në liqen dhe një koncert festiv, që i dha ngjyrë qytetit dhe tërhiqte vizitorë nga zonat përreth.
Ceremonia e hedhjes së rasatit të koranit mblodhi përfaqësues të pushtetit vendor, institucione të qarkut dhe qindra qytetarë e turistë. Kryetari i Bashkisë Pogradec, Ilir Xhakolli, theksoi se ky aktivitet po shndërrohet në një traditë vjetore që jo vetëm ndihmon në ruajtjen e ekosistemit të liqenit, por edhe shton atraksionet për vizitorët. Xhakolli bëri të ditur se këtë vit janë hedhur rreth 200 mijë rasate më shumë se një vit më parë, duke forcuar qëndrueshmërinë e koranit.
Ceremonia u mbyll me atmosferë festive, ku këngëtarë të njohur kanë performuar në sheshin Odeon, duke gjallëruar qytetin liqenor. Festivali mbetet një mundësi e jashtëzakonshme për qytetarët dhe turistët për të shijuar kulturën, kuzhinën dhe bukuritë natyrore të zonës.
