Një fluks i lartë udhëtarësh është shënuar në pikën e kalimit kufitar të Kapshticës, ku qytetarët që udhëtojnë drejt Greqisë janë përballur me pritje prej më shumë se një ore në radhë. Kapshtica, në bashkinë Devoll, është pika kryesore kufitare e qarkut me Greqinë dhe përballon një pjesë të madhe të lëvizjeve të zonës juglindore.
Blerjet përtej kufirit dhe ulja e shpenzimeve
Krahas udhëtimeve të zakonshme të fundjavës, një nga faktorët kryesorë të shtimit të fluksit mbetet vendimi i shumë banorëve nga Korça dhe e gjithë zona e juglindjes për të bërë pazar në shtetin fqinj. Çmimi më i ulët i naftës, si dhe diferencat e ndjeshme në çmimet e artikujve ushqimorë, po nxisin familjet të kalojnë kufirin për të siguruar furnizimet e përditshme me kosto më të ulët.
Për qytetarët e zonave pranë kufirit, furnizimi në Greqi është kthyer në një alternativë praktike për menaxhimin e buxhetit familjar, ndonëse kjo ka rritur ndjeshëm ngarkesën në sportele. Në pikën kufitare vijojnë procedurat e përpunimit të udhëtarëve, ndërsa burime nga kufiri bëjnë të ditur se gjatë fundjavave dalin nga Shqipëria më tepër se 10.000 shtetas.
