Korça po bëhet gati të mirëpresë një tjetër edicion spektakolar të Festa e Birrës, një prej ngjarjeve më të mëdha festive në vend, që prej 18 vitesh bashkon mijëra vizitorë nga çdo cep i Shqipërisë dhe jashtë saj. Pas suksesit rekord të vitit të kaluar, ku mbi 60 mijë njerëz mbushën sheshet e qytetit, edicioni i sivjetshëm pritet të vazhdojë traditën me edhe më shumë energji, muzikë dhe surpriza të reja.
Organizatorët kanë paralajmëruar një program të pasur me artistë të njohur shqiptarë dhe ndërkombëtarë, që do të performojnë live në skenat e Korçës, duke krijuar një atmosferë unike festimi. Për pesë netë me radhë, qyteti do të shndërrohet në qendrën e muzikës, argëtimit dhe miqësisë, ku birra korçare do të rrjedhë si simbol i traditës dhe mikpritjes.
Edicioni i ri mbështetet nga Bashkia Korçë dhe një sërë partnerësh e sponsorësh që synojnë ta bëjnë këtë festë edhe më të madhe e më të paharrueshme.
Korça Beer Fest nuk është vetëm një festë birre, por një udhëtim në zemrën e traditës, ku çdo vizitor largohet me kujtime të veçanta dhe me dëshirën për t’u rikthyer përsëri.
