Korça po konfirmohet si një prej motorëve të turizmit shqiptar, me një rritje të ndjeshme të prenotimeve jo vetëm për këtë verë, por edhe për festat e fundvitit dhe madje për vitin 2026.
Operatorët turistikë tregojnë se interesi i vizitorëve vendas dhe të huaj është rritur falë klimës së freskët, fshatrave piktoreskë dhe aktiviteteve kulturore që gjallërojnë qytetin. Këtë sezon, prenotimet janë të shumta, veçanërisht drejt destinacioneve si Dardha, Voskopoja dhe Boboshtica, të cilat ofrojnë natyrë të mrekullueshme dhe kulinari tradicionale.
Përveç natyrës, Korça po spikat edhe me një kalendar të pasur eventesh kulturore që pritet të tërheqë mijëra turistë. Nga 10 deri më 13 korrik, rikthehet MIK Festival, nën drejtimin e sopranos me famë ndërkombëtare Inva Mula, duke sjellë muzikë klasike e bashkëkohore me artistë nga e gjithë bota.
Në datat 25 dhe 26 korrik, qyteti do të pulsojë në ritmin e Lumina Electronic Festival, që mbledh DJ ndërkombëtarë, muzikë elektronike dhe drita spektakolare në Parkun Rinia, me hyrje falas për publikun.
Ndërsa nga 13 deri më 17 gusht, atmosfera festive kulmon me Festa e Birrës, një prej ngjarjeve më të mëdha në vend, që vitin e kaluar mblodhi mbi 60 mijë vizitorë dhe pritet të sjellë surpriza të reja edhe këtë vit.
Korça po e konsolidon gjithnjë e më shumë pozicionin si një destinacion i preferuar turistik, që ofron jo vetëm natyrë të bukur dhe mikpritje tradicionale, por edhe një jetë kulturore dinamike që nuk duhet humbur.
