Atmosfera e festës po afron në Korçë, e cila më 7 qershor do të shndërrohet në kryeqendrën e ngjyrave dhe muzikës me zhvillimin e Festivalit Ndërkombëtar të Karnavaleve. Ky event jo vetëm që shënon hapjen zyrtare të sezonit turistik veror, por sjell në qytet një energji të veçantë, që bashkon artin, kulturën dhe argëtimin për të gjitha moshat.
Zamira Kita, drejtoreshë e Qendrës së Artit dhe Kulturës në Korçë, tregon se përgatitjet janë drejt finalizimit dhe interesi nga qytetarët për t’u bërë pjesë e paradës është i madh.
“Jemi shumë të lumtur që Festivali i Karnavaleve po kthehet me këtë energji. Shumë qytetarë kanë shprehur dëshirën për të marrë pjesë dhe ne si institucion, po punojmë për të krijuar kostume të reja.” – u shpreh Kita.
Sipas Kitës, në paradën madhështore që do të zhvillohet në bulevardet kryesore të qytetit, do të marrin pjesë grupe artistike nga vende të ndryshme, përfshirë trupa nga vende të rajonit si Maqedonia e Veriut, Greqia, Mali i Zi dhe Bullgaria, ndërkohë që për herë të parë pjesmarrës do të jetë edhe një grup nga Polonia. Performanca me koreografi të veçanta, maska unike dhe muzikë live do të sjellin një atmosferë ndërkombëtare në qytetin e serenatave.
Në mbyllje të paradës, festa do të zhvendoset në një tjetër dimension me Karnaval Party, që do të zhvillohet në ambientet e Pazarit të Vjetër të Korçës. Muzikë, DJ, drita dhe argëtim deri në orët e vona do të mbyllin këtë ditë të veçantë, duke krijuar një atmosferë të paharrueshme për banorët dhe vizitorët.
Korça është gati për të mirëpritur miq nga e gjithë Shqipëria dhe më gjerë, në një nga ngjarjet më të bukura të verës që tashmë është shndërruar në traditë.
