Në kuadër të çeljes zyrtare të sezonit turistik, Bashkia Korçë mirëpriti përfaqësuesit e agjencive turistike më aktive në vend, në një aktivitet promovues që synon forcimin e bashkëpunimit për nxitjen e turizmit në rajon.
Eventi u zhvillua në një atmosferë miqësore dhe plot gjallëri, duke u kthyer në një mundësi të vyer për të prezantuar përpara operatorëve turistikë ofertën e pasur dhe të larmishme që Korça ofron për sezonin veror 2025.
Nga natyra e mrekullueshme dhe trashëgimia e pasur kulturore, te gastronomia autentike dhe kalendari dinamik i eventeve kulturore e festive, Korça synon të mbetet një nga destinacionet më të preferuara për mijëra vizitorë vendas dhe të huaj.
Gjatë aktivitetit, u promovua edhe albumi fotografik “Korça – The Heartland”, një vepër artistike e realizuar nga fotografi i njohur shqiptar Alber Cmeta. Albumi, fryt i një pune 12-vjeçare, përmbledh bukuritë natyrore, trashëgiminë kulturore dhe historike të rajonit të Korçës, dhe nga sot është shpallur si suveniri zyrtar i Bashkisë Korçë.
Me këtë nisje simbolike, Korça është gati për një sezon veror të jashtëzakonshëm, duke ftuar vizitorët të zbulojnë thesaret e saj dhe të përjetojnë një verë plot përjetime unike.
