Trafiku i dendur vijon të mbetet një sfidë në qytetin e Korçës, ku fluksi i lartë i automjeteve ka krijuar vështirësi në qarkullimin rrugor. Për të normalizuar situatën, Sektori i Policisë Rrugore ka ndërmarrë masa shtesë, duke rritur numrin e grupeve patrulluese dhe duke zgjatur orët e shërbimit për trupat policore.
Në orët e pikut, autoritetet janë detyruar të kalojnë disa segmente rrugore në një kalim të vetëm, për të menaxhuar fluksin dhe shmangur kaosin. Sipas burimeve zyrtare, ndërhyrjet po bëhen kryesisht në rrugët kryesore që lidhin qendrën e qytetit me lagjet periferike, ku trafiku është më i rënduar.
Policia u ka bërë thirrje drejtuesve të mjeteve të respektojnë sinjalistikën dhe udhëzimet e dhëna, për të lehtësuar qarkullimin dhe shmangur incidentet. Masat e shtuara pritet të vijojnë derisa trafiku të kthehet në normalitet.
