Policia e Korçës ka finalizuar me sukses një tjetër operacion antidrogë të koduar “Split”, i cili kishte në fokus goditjen e shpërndarjes së lëndëve narkotike në doza të vogla, në zona të banuara.
Në kuadër të këtij operacioni, të zhvilluar nga Specialistët për Hetimin e Narkotikëve të DVP Korçë në bashkëpunim me Forcën e Posaçme “Shqiponja”, u arrestua në flagrancë F. L., 21 vjeç, banues në Korçë, i cili dyshohet se shiste doza kanabisi në lagjen nr. 8 të qytetit.
Gjatë kontrollit fizik ndaj tij, u sekuestruan doza të gatshme për shitje, një telefon celular dhe një shumë parash e dyshuar si e përfituar nga kjo veprimtari kriminale.
Po gjatë operacionit, u kap në flagrancë edhe një 29-vjeçar, M. K., gjithashtu banues në Korçë, me doza kanabisi që dyshohet se ia kishte blerë 21-vjeçarit. Ndaj tij nisi procedimi penal në gjendje të lirë.
Të gjitha materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore, në ngarkim të të arrestuarit dhe të proceduarit, për veprën penale “Prodhimi dhe shitja e narkotikëve”.
Policia e Korçës thekson se kontrollet intensive kundër shpërndarjes së drogës në zona të banuara do të vijojnë pa ndërprerje.
