Në qytetin e Pogradecit ka nisur një aksion i gjerë për lirimin e hapësirave publike, i cili po zbatohet me intensitet të shtuar në lagjen nr. 5. Qëllimi i këtij operacioni është kthimi i hapësirave të zëna padrejtësisht nga individë apo subjekte private, për t’ua rikthyer qytetarëve si hapësira të përbashkëta.
Drejtori i Agjencisë së Mbrojtjes së Territorit në bashkinë e Pogradecit, Markel Hafesllari, bëri të ditur se ndërhyrjet kanë nisur që nga lagjja Kala dhe po vijojnë në zona të tjera të qytetit. Deri tani janë evidentuar mbi 60 ndërtime pa leje vetëm në dy lagje, ndërkohë që verifikimet po shtrihen edhe në lagjet e tjera.
Hafesllari u ka bërë thirrje qytetarëve që të lirojnë hapësirat në mënyrë vullnetare. Ai theksoi se procesi ka vijuar pa rezistencë, madje në disa raste vetë poseduesit kanë nisur çmontimin e platformave të ndërtuara pa leje.
Autoritetet vendore kanë deklaruar se aksioni do të vijojë në të gjitha lagjet e Pogradecit, me synimin për të krijuar një mjedis më të pastër, më të rregullt dhe më të aksesueshëm për të gjithë banorët.
Një pjesë e ndërtimeve të paligjshme janë raportuar edhe në platformën qeveritare “Hapësira Ime”, duke i dhënë qytetarëve mundësinë të kontribuojnë në evidentimin e rasteve të tilla.
