Qendra shëndetësore verore në Pogradec ka vijuar edhe këtë vit t’i shërbejë pushuesve dhe banorëve të zonës, duke regjistruar rreth 4 mijë vizita që prej 1 qershorit. Kjo qendër, e ngritur prej një dekade në qytetin liqenor, mbetet një pikë referimi e rëndësishme për ndihmën e menjëhershme gjatë sezonit të verës.
Drejtuesja e Njësisë Vendore të Kujdesit Shëndetësor në Pogradec, Elona Katiraj, konfirmon se fluksi i vizitave ka qenë i lartë, ndërsa pjesa më e madhe e pacientëve kanë qenë të moshuar. Problemet më të shpeshta të evidentuara lidhen me hipertensionin, alergjitë, pickimet, reaksionet e ndryshme dhe virozat sezonale.
E vendosur pranë plazhit të qytetit, qendra shëndetësore verore në Pogradec mbetet një mbështetje thelbësore për turistët dhe komunitetin lokal, duke garantuar kujdes shëndetësor të menjëhershëm në një periudhë kur qyteti përjeton rritje të ndjeshme të popullsisë.
