Fuati lindi më 9 maj 1925, në lagjen Goricë, Pogradec. Në vendlindje mbaroi shkollën 7 vjeçare me rezultate të larta dhe më pas i ati e dërgoi për të vazhduar studimet në Medresenë e Përgjithshme në Tiranë, ku u diplomua në vitin 1947 si student i dalluar.
Emërohet si mësues i matematikës në Zall Bastar, fshat i largët në Malësinë e Tiranës, në fshatin Orgjost të Komunës së Zapodit ku punoi për më tepër se 3 vjet.
Në fund të viteve ’50 i ofrojnë mundësinë për të dhënë mësim në fshatin Çërravë të Pogradecit, duke qënë i detyruar të udhëtojë çdo ditë në këmbë vajtje-ardhje nga Pogradeci. Në vitet ’70 kur u emërua më pas mësues në Shkollën “Koli Gusho” e më vonë në Shkollën “30 vjetori” sot “Kozma Basho” ku edhe doli në pension. I përkushtuar, adhurues dhe praktikant i besimit musliman, i rritur në një familje me tradita të hershme hoxhallarësh (stërgjyshi Mulla Jaçe, gjyshi Mulla Suli dhe i ati Sulejmani) nuk hoqi dorë nga besimi duke u përpjekur të ruante në kufij fshehtësinë.
Në shtëpi festohej Bajrami, agjëronte dhe i falte të gjitha vaktet në fshehtësi, në dhomën e vogël në katin e dytë të shtëpisë të cilën e mbyllte me çelës. Periudhën e pensionit ja përkushtoi tërësisht dedikimit për librin, përkthimit, dhe leximit kryesisht të literaturës në gjuhën arabe, përktheu disa vëllime të fjalorëve arabë në gjuhën shqipe.
Pas ndryshimeve politike në vitet ‘90 dhe lejimin e besimit fetar, ushtroi detyrën e Myftiut të rrethit.
Për meritat dhe kontributin e tij si mësues dhe klerik, Bashkia Pogradec e ka nderuar me titullin “Qytetar Nderi”.
