Në prag të sezonit turistik, Policia Bashkiake e Pogradecit ka nisur zbatimin e një sistemi të ri online për vendosjen e gjobave, me synimin për të lehtësuar menaxhimin e trafikut dhe lirimin e hapësirave publike. Ky sistem dixhital përbën një hap drejt modernizimit të shërbimeve dhe rritjes së efikasitetit në zbatimin e rregullave, sidomos në një periudhë kur qyteti përballet me një fluks të lartë turistësh dhe vizitorësh.
Kryeinspektori i Policisë Bashkiake, Markel Hafesllari, bëri të ditur se fokus i veçantë do t’i kushtohet parkimeve të gabuara dhe zbatimit të pullës së rezidentit, e cila synon të rregullojë përdorimin e hapësirave sipas zonave të banuara. Ai tha gjithashtu se në terren do të jenë të angazhuar 25 efektivë, të shpërndarë në zonat më të frekuentuara të qytetit, si shëtitorja, Tushemishti, Lini dhe lagjet urbane. Patrullat do të operojnë me mjete, biçikleta dhe në këmbë.
Policia Bashkiake do të punojë në bashkëpunim të ngushtë me Policinë e Shtetit dhe atë Rrugore, ndërsa në ditët në vijim pritet të vihet në funksion edhe një numër kontakti për qytetarët, ku mund të raportohen shqetësime apo të merren informacione mbi shërbimet. Ky sistem i ri synon jo vetëm të sjellë rregull në qytet gjatë sezonit veror, por edhe të përmirësojë ndërveprimin me komunitetin.
