Policia e Korçës ka shpallur një plan të posaçëm masash për garantimin e rendit dhe sigurisë publike gjatë Festës së Birrës 2025, e cila do të zhvillohet nga data 13 deri më 17 gusht, në terminalin e autobusëve dhe Pazarin e Vjetër, nga ora 20:00 deri në orën 01:00.
Drejtoria Vendore e Policisë Korçë, në bashkëpunim me strukturat në varësi të saj, ka marrë një sërë masash për zhvillimin sa më të qetë e festiv të aktivitetit. Këto masa përfshijnë përforcimin e sigurisë rrugore, disiplinimin e lëvizjes së automjeteve, menaxhimin e trafikut, parandalimin e aksidenteve, si dhe kontrollin e personave me precedent penal. Po ashtu, policia do të punojë për parandalimin e krimeve kundër personit e pronës, krimeve financiare dhe atyre që lidhen me narkotikët.
Për garantimin e rendit, janë parashikuar patrullime dhe kontrolle të përbashkëta me Policinë Bashkiake. Nga shërbimet e Policisë Rrugore do të bllokohet qarkullimi i automjeteve nga “City Center” deri te rrethrrotullimi pranë terminalit të autobusëve, nga ora 19:30 deri në 01:00, ndërsa parkimet do të orientohen në zonat e përcaktuara nga Bashkia Korçë. Trafiku i mjeteve dhe lëvizja e këmbësorëve do të menaxhohet në rrugët “Midhi Kostani”, “Kiço Greço” dhe “Marigo Pozio”, si dhe në pikat hyrëse të terminalit.
Në vendet ku pritet grumbullim i madh njerëzish, në bulevardet kryesore dhe në akset që lidhin Korçën me rrethet e tjera, do të ketë prezencë të shtuar të Policisë së Rendit, Policisë Kriminale, Policisë Rrugore, grupeve të FNSH-së dhe Forcës së Posaçme “Shqiponja”. Ata do të mbikëqyrin ruajtjen e rendit, do të ndërhyjnë për zgjidhjen e problematikave dhe do të parandalojnë situata që mund të cenojnë sigurinë publike.
Policia Rrugore u bën apel drejtuesve të automjeteve të respektojnë rregullat e qarkullimit, të mos përdorin pije alkoolike gjatë drejtimit të mjetit, të vendosin rripin e sigurimit dhe kaskën mbrojtëse, si dhe të shmangin përdorimin e celularit. Për lëvizje më të sigurta, rekomandohet përdorimi i transportit publik.
Shërbimet e rendit do të mbajnë gjithashtu kontakt me drejtuesit e objekteve me rëndësi të veçantë, si nënstacionet elektrike dhe ujësjellësit, për forcimin e masave të ruajtjes së tyre. Qytetarët që hasin problematika apo shqetësime, mund të kontaktojnë numrat pa pagesë 112 dhe 129, ku Policia e Shtetit garanton reagim të shpejtë dhe të paanshëm.
