Ka nisur zyrtarisht Rally Albania 2025, edicioni i 21-të i garës ndërkombëtare që shndërron Shqipërinë në një pistë natyrore për motorë dhe makina të terrenit të vështirë. Këtë vit, rrugët malore, shtigjet me gurë dhe peizazhet e paprekura shqiptare po sfidohen nga 200 pilotë të ardhur nga 23 shtete të botës, mes tyre SHBA, Australia, Italia, Franca, Greqia dhe vende të tjera europiane.
Gara ka startuar nga Shkodra, ka vijuar drejt Korçës, për të përshkuar më tej rrugë drejt jugut të vendit në Vlorë, dhe do të përmbyllet me etapat përfundimtare në Tiranë.
Pjesëmarrësit e huaj nuk kursejnë fjalët për përvojën e tyre pozitive në Shqipëri. Ata vlerësojnë jo vetëm natyrën sfiduese të terrenit, por mbi të gjitha mikpritjen e banorëve në zonat që kalojnë. Nga ana tjetër, garuesit shqiptarë tregojnë se për ta, Rally Albania është bërë tashmë pjesë e përditshmërisë.
“Jam pjesë e këtij eventi prej 10 vitesh. Është një përzierje e pasionit, adrenalinës dhe dashurisë për natyrën. Nuk është e lehtë, por është një emocion që nuk zëvendësohet,” thotë një prej garuesve shqiptarë.
“Jam për herë të dytë në këtë garë. Rrugët janë të egra, sfiduese, por pikërisht kjo e bën këtë eksperiencë unike,” shprehet një garues i huaj.
“Shqipëria është një zbulim i jashtëzakonshëm. Në fshatra na kanë pritur me zemër. Është një vend me shumë potencial për turizmin aventurier,” shton një tjetër.
Sipas Julinda Dhamës, një prej organizatoreve të eventit, Rally Albania nuk është vetëm garë, por një instrument i fuqishëm për promovimin e Shqipërisë në tregje turistike të reja.
“Ne synojmë që përmes këtij eventi të çojmë emrin e Shqipërisë edhe në ato vende ku turizmi nuk ka mbërritur ende. Malet dhe zonat e paprekura janë një thesar që duhet të njihen dhe të shijohen përmes këtij sporti,” u shpreh ajo.
Rally Albania mbetet një nga aktivitetet më të veçanta sportive në Shqipëri, që jo vetëm sjell emocione për garuesit, por edhe i jep jetë dhe promovim zonave rurale të vendit, duke tërhequr vëmendjen ndërkombëtare drejt një Shqipërie autentike dhe sfiduese.
