Kryeministri Edi Rama mbledh këtë të hënë kabinetin qeveritar në qytetin e Pogradecit, në një takim joformal që shënon nisjen e sezonit të ri politik pas pushimeve verore. Ky takim i formatit të ashtuquajtur retreat qeveritar vjen menjëherë pas një mbledhjeje të gjatë disaorëshe që kreu i qeverisë zhvilloi të dielën me drejtuesit politikë të Partisë Socialiste në qarqe dhe drejtuesit e komisioneve parlamentare. Në këtë tryezë të re me ministrat, fokusi kryesor do të jetë bilanci i punës së deritanishme të secilës ministri, si dhe përcaktimi i prioriteteve për fazën e ardhshme të qeverisjes.
Diskutimet për dokumentet strategjike dhe platformat e reja
Gjatë diskutimeve të ditës së diel me strukturat socialiste, vëmendja u përqendrua te dokumentet e prezantuara nga kryeministri në fund të muajit korrik, të emërtuara Besa dhe Prania Besnike. Këto dokumente synojnë të përcaktojnë një qasje të re të partisë në pushtet gjatë mandatit të ri qeverisës.
Një tjetër pikë e rëndësishme e diskutimeve ishte platforma e prezantuar nga socialistët e quajtur Pasqyrë Albania, e cila shërben për evidentimin dhe ndjekjen në kohë reale të shqetësimeve dhe problematikave të ngritura nga qytetarët. Pas raportimeve të strukturave politike, tashmë është radha e anëtarëve të kabinetit qeveritar për të paraqitur rezultatet e tyre në Pogradec.
