Një performancë unike në mes të natyrës – kështu ka zgjedhur violonçelisti i talentuar korçar Riçard Gedaj për të promovuar një nga atraksionet më të bukura të Shqipërisë juglindore, Parkun natyror të Drilonit, i transformuar tashmë në një destinacion modern turistik. Videoja e interpretuar gjatë një lundrimi magjik me varkë në mes të gjelbërimit dhe qetësisë së ujit është publikuar në rrjetet sociale nga Kryeministri Edi Rama, duke tërhequr vëmendjen e publikut për bukurinë dhe potencialin e këtij parku të veçantë.
Parku i Drilonit, i njohur ndryshe edhe si Voloreka nga pogradecarët, ndodhet vetëm 6 kilometra nga qyteti i Pogradecit dhe është shndërruar në një pol të rëndësishëm ekoturistik që tërheq vizitorë jo vetëm nga Shqipëria, por edhe nga rajoni. Në të njëjtën zonë ndodhet edhe fshati Tushemisht, i lidhur fort me ikonën kulturore të “Zonjës nga Qyteti”, i cili i shton kësaj treve një tjetër dimension emocional dhe historik.
Transformimi i parkut përfshin ndërtimin e rreth 4 000 metrave rrugica për këmbësorët, 13 ura të reja, korsi biçikletash, dhe mbi 8 000 pemë të mbjella, të gjitha në funksion të zhvillimit të turizmit të qëndrueshëm. Sipërfaqja e shëtitores dhe parkut është shumëfishuar në 150 hektarë, ndërsa janë krijuar edhe 5 kilometra rrugë të lundrueshme me varkë, që lejojnë eksplorimin e parkut nga uji.
Driloni është një burim natyror karstik, me tri rrjedha uji që derdhen në juglindje të Liqenit të Ohrit. Ky ambient natyror ofron një përzierje unike të florës dhe faunës, me pemë të rralla si vërri, rrapi, shelgu lotues, plepi dhe kallamishtet që freskojnë ajrin dhe krijojnë një mikroklimë të pastër e të shëndetshme. Mjellmat dhe shpendët e tjerë shtojnë më tej hijeshinë e këtij peizazhi të rrallë.
Përmes muzikës dhe artit, Riçard Gedaj ka sjellë një mënyrë të re për të promovuar pasuritë natyrore të vendit, duke e kthyer parkun e Drilonit në një skenë të hapur ku natyra dhe kultura takohen në harmoni të plotë.
