Trajneri i Kombëtares shqiptare, Rolando Maran, ka nisur zyrtarisht një tur takimesh me klubet e kampionatit “Abissnet Superiore”, me synim forcimin e bashkëpunimit me futbollin vendas dhe monitorimin e elementëve me potencial për përfaqësuesen kuqezi.
Vizita e parë në ambientet e KF Tiranës
I shoqëruar nga ndihmësit e tij, Christian Maraner dhe Ervin Bulku, tekniku i Kombëtares zhvilloi vizitën e parë në ambientet e klubit të KF Tiranës. Gjatë këtij ndalimi, Rolando Maran u takua me trajnerin e bardhebluve, Dean Klafuriç, si dhe ndoqi nga afër një seancë të plotë stërvitore të skuadrës kryeqytetase.
Kjo vizitë shërbeu për shkëmbimin e ideve dhe përvojave mbi punën e përditshme, zhvillimin e futbollistëve dhe situatën aktuale teknike në kampionat. Qasja e stafit të përfaqësueses synon krijimin e një komunikimi të drejtpërdrejtë me stafet teknike të klubeve shqiptare për të pasur një panoramë sa më të plotë mbi ecurinë e lojtarëve.
Vëzhgimi i klubeve në kupat e Europës dhe hapat e mëtejshëm
Përveç takimeve në vend, gjatë javëve të fundit Rolando Maran ka ndjekur nga afër edhe paraqitjet e ekipeve të Egnatias dhe Dinamo City në kompeticionet europiane, duke vëzhguar performancën e futbollistëve shqiptarë në arenën ndërkombëtare.
Turi i takimeve të teknikut kuqezi do të vijojë me të gjitha klubet e tjera të “Abissnet Superiore”. Stafi teknik i Kombëtares planifikon bisedime me trajnerët, drejtuesit dhe futbollistët e çdo skuadre, me qëllim ngritjen e një ure të qëndrueshme komunikimi në shërbim të zhvillimit të futbollit shqiptar.
