Prokuroria e Posaçme kundër Korrupsionit dhe Krimit të Organizuar (SPAK) ka sekuestruar sot një automjet luksoz të llojit “Land Rover” në pronësi të shtetasit Ergys Agasi, i cili u arrestua nga policia mbrëmjen e së mërkurës. Sipas informacioneve, mjeti ndodhej i parkuar pranë një prej vilave private në një resort në Tiranë.
Arrestimi dhe akuzat e ngritura nga SPAK
I dyshuari u vu në pranga në afërsi të Durrësit, pas një operacioni të nisur që nga Elbasani. Ergys Agasi ishte shpallur në kërkim nga SPAK që prej muajit dhjetor 2025, ndërsa aksioni për lokalizimin dhe kapjen e tij u finalizua mbrëmjen e djeshme.
Sipas organit të akuzës, ndaj Agasit janë ngritur dyshime për disa vepra penale, përfshirë “Shkelje e barazisë në tenderë apo ankande publike”, “Konkurrencë e paligjshme nëpërmjet dhunës”, “Heqje e paligjshme e lirisë”, si dhe “Pastrim i produkteve të veprës penale”. Hetimet për rastin vazhdojnë, ndërsa personi i hetuar gëzon prezumimin e pafajësisë deri në një vendim përfundimtar gjykate.
