Voskopoja, ky fshat turistik që ofron një përzierje të pasur historie, kulture, natyre të mrekullueshme dhe gatime tradicionale të pakrahasueshme. Rreth 20 kilometra larg nga Korça, ky fshat mirëpret rreth 20 mijë turistë çdo vit.
Një ndër atraksionet më të veçanta të Voskopojës është një kamp i ngritur për punëtorët para viteve ’90, që tani ka marrë një pamje krejtësisht të ndryshme. I ndërtuar me gurë dhe dru, ky kamp pret qindra pushues në çdo stinë të vitit.
I rrethuar nga bredhat e lartë, Voskopoja ka ajër të pasur me ozon, që arrin deri në 24%, një përqindje që në Evropë mund të gjendet vetëm në një fshat në Bjellorusi. Por ky fshat nuk shquhet vetëm për natyrën e tij. Shtëpitë dhe bujtinat e ndërtuara me gur dhe shije janë gjithashtu një atraksion i madh. Gatimet tradicionale të amvisave voskopojare si gjeli i fshatit, shqerra e pjekur, petullat e gollozhegut, bakllavaja dhe pengjiri janë disa nga pjatat më të preferuara të turistëve, që vijnë nga brenda dhe jashtë vendit.
Për festat e fundvitit, prenotimet në bujtinat dhe restorantet e zonës janë mbyllur që një muaj më parë. Turistët e shijojnë çdo pjatë tradicionale të servirur në mënyrë të përkryer.
Banorët e Voskopojës kanë ndërtuar një kulturë mikpritëse, që çdo vit arrin kulmin më 31 dhjetor me vizitorët e shumtë. Kreu i komunës, Nexhip Bacilli, tregon se pavarësisht fluksit të lartë të turistëve në çdo stinë të vitit, mungesa dhe numri i vogël i ambienteve akomoduese mbeten një sfidë për mikpritjen e tyre. Aktualisht, Voskopoja ka rreth 200 shtëpi dhe disa hotele.
Voskopoja ka filluar të ekzistojë që nga shekulli i 14-të, por lulëzimi më i madh i saj ndodhi në shekullin e 18-të kur u bë qyteti i dytë më i madh në Perandorinë Osmane me rreth 50 mijë banorë. Fundi i këtij lulëzimi erdhi me shkatërrimin e plotë të qytetit gjatë viteve 1769, 1772 dhe 1789, dhe më pas përfundimisht gjatë Luftës së Parë Botërore në 1916.
E rrethuar nga malet dhe pyjet e dendur, Voskopoja mbetet një nga vendet më të mrekullueshme. Shërbyer si frymëzim për shkrimtarë, studiues dhe historianë, ky fshat vazhdon të jetë një vatër e kulturës. Kultura sot po luan një rol gjithnjë e më të madh në tërheqjen e turistëve.
Një vizitë në Voskopojë, sado e shkurtër, është një përvojë që mbetet e paharrueshme.
