Genci Vesho, 52-vjeçari nga Pogradeci është personi më i vjetër në detyrë në qytetin liqenor. Prej 34 vitesh ai ushtron profesionin e postierit, duke e bërë këtë punë me pasion, pa u lodhur apo mërzitur me të. E ka nisur që në klasën e 8, vullnetarisht, për t’iu bashkuar pas disa viteve stafit të postës. “Hapat e para kanë qenë hapat e parë, në vitet 1977-1978 dhe ka vazhduar deri më sot”, tregon ai.
Është një punë e përditshme që nis në orën 7 të mëngjesit, pa marrë parasysh tw nxehtin wn verw apo temperaturat e ulta dhe akullin, në ditë dimri. Puna vazhdon në këmbë dhe nuk ka vend apo rrugicë të qytetit, që nuk e njeh dhe që nuk e ka shkelur.
Por gjëja më kryesore që ai ka fituar dhe vlerëson më shumë në mbi tre dekada në këtë punë është respekti që ka fituar te njerëzit. “Është një zanat që krijon afrimitet me qytetin, unë e respektoj qytetarin dhe e marr mbrapsht respektin”, thotë ai.
Në këtë stad, ai shpreh se nuk ka më asnjë vështirësi në realizimin e detyrës së tij. Por përgatitja e postierëve të rinj po duket çdo ditë e më shumë një mision i vështirë, pasi të rinjtë nuk tërhiqen nga kjo punë. Për fat të qytetarëve të Pogradecit, Genci do të jetë edhe për shumë vite të tjera në këtë pozicion. “Nuk kam për ta lënë. Shpresoj ta mbyll me nder këtë punë”.
Çdo profesion, përveç përgatitjes, natyrisht ka nevojë edhe për pasionin dhe dëshirën, dhe rasti i postierit Genci Vesho e vërteton më së miri këtë fakt.
