“Festa e Birrës” veçse një festival dhe një përçues i kulturës dhe traditës vendase është tashmë një burim i mirë i rritjes së të ardhurave për familjet, bizneset dhe në tërësi për bashkinë e Korçës. Kjo festë sjell një “boom” në zhvillimin ekonomik lokal.
Në 5 ditët e festivalit, të gjitha kapacitetet hoteliere, bujtinat, restorantet janë të zëna nga prenotimet e shumta, gjë që përkthehet në rritje të fitimeve.
Në edicionin e vitit të kaluar vetëm në qytet të ardhurat nga akomodimi shkuan në rreth 55 milionë lekë, duke llogaritur këtu një mesatare prej 50-60 euro për natë. Ndërsa të ardhurat për ekonominë qytetare shkojnë edhe më shumë, kur shtohen këtu edhe shpenzimet në restorante e kafene. Kompanitë e birrave llogarisin fitime të mëdha përgjatë 5 ditëve të festës, e cila veçse një panair birre është edhe një panair gastronomik, ku shijohen gatimet fantastike të zonës së Korçës.
Tregtarë suveniresh, punimesh artizanale korçare gjithashtu kanë qenë të kënaqur në vitet e shkuara nga shitjet e tyre.
Qyteti i Korçës prej vitesh është kthyer tashmë jo vetëm në një destinacion të fundjavës, por qëllimi i bashkisë është ta kthejë atë në një destinacion të turizmit përgjatë gjithë vitit.
