Teksa po realizoja një material televiziv në Lin, takova Frenkun i cili kish mbrritur nga Zelanda e Re në vendin tonë, ishte mes shumë gjermanëve, francezëve, italianëve dhe polakëve që vizitojnë këto ditë Pogradecin.
E gjej duke u ngjitur me biçikletë drejt Bazilikës së Linit në majë të gadishullit.
I lodhur por entuziast, “kam ardhur të vizitoj vendbanimin e parë në Europë më tha. Kam lexuar që ka qenë i banuar 8 mijë vjet më parë, u bëra kurioz dhe i thashë gruas do ikim në Shqipëri.
Kam gati dy javë këtu, 1 javë e kaluam në Gjirokastër, qyteti i gurtë ishte fantastik!
Prej disa disa ditësh jam në Pogradec, kam parë qytetin, Muzeun Historik, Trëndafilat, vërtet fantastik, këtu është shumë pastër dhe bukur.
Më ka bërë përshtypje xhiroja e mbrëmjes, plot, plot e përplot me njerëz miqësorë që shëtisin.
Ushqimi fantastik, korani ishte i mrekullueshëm!
Jam 70 vjeç dhe prej dy ditësh me bashkëshorten i ramë rreth e qark liqenit me biçikletë, u mahnita! Me një fjalë Shqipërinë mund ta përshkruaj “Autentike”.
Nuk kisha çfarë ti thoja më, veçse ta falenderoja për aq shumë fjalë të bukura që tha për vendin tonë.
p.s Ne e kemi këtë vend dhe në shumë raste vjellim vrer
