Deputeti i Partisë Socialiste, Erion Braçe, falënderoi sot nga Kuvendi i shqipërisë ministrin e Brendshëm Taulant Balla, për heqjen e masës administrative të ndërmarrë nga Policia e Shtetit kundrejt fermerëve të Maliqit, pas protestës së tyre të disa ditëve më parë. Pavarësisht vendimit për heqjen e gjobave, ato ende vijojnë të jenë aktive në sistem, ndërkohë që pritet anulimi i tyre zyrtar.
Fermerët e Maliqit dolën në protestë disa ditë më parë duke bllokuar aksin rrugor Libonik-Drithas. Dhjetëra fermerë u gjobitën me 100 mijë lekë të reja. Sipas policisë, shkaku i gjobave ishte zënia e sipërfaqes rrugore të aksit Libonik-Drithas pa leje dhe pa shkak të arsyetueshëm, duke penguar qarkullimin e lirë të mjeteve.
Fermerët argumentuan se mungesa e subvencioneve rrit koston e prodhimit të tyre, duke i bërë ata të konkurrohen padrejtësisht nga prodhimet e importuara. Për këtë arsye, ata kërkojnë ndërhyrjen e shtetit për rregullimin e tregut dhe përmirësimin e fushës së bujqësisë.
