Korçë – Policia e Korçës ka trajtuar disa raste dhune dhe ngacmimi në rajon, të cilat kanë çuar në procedime penale dhe shpallje në kërkim të disa personave.
Në Ersekë, shtetasi F. M., 35 vjeç, banues në fshatin Bejkovë, dyshohet se ka goditur me grusht një 45-vjeçar për motive të dobëta. Materialet për këtë rast janë referuar në Prokurorinë pranë Gjykatës së Shkallës së Parë Korçë, për veprime të mëtejshme.
Në Maliq, shtetasi O. Q., 47 vjeç, është proceduar penalisht për ushtrim dhune ndaj bashkëshortes së tij, e cila ka marrë urdhër mbrojtjeje.
Gjithashtu, një tjetër rast shqetësues është raportuar në Maliq, ku shtetasi A. L., 34 vjeç, dyshohet se ka ngacmuar një 17-vjeçare nëpërmjet telefonit. Ai është shpallur në kërkim dhe materialet për këtë rast i janë referuar Prokurorisë.
Policia vijon hetimet dhe apelon për raportimin e rasteve të dhunës dhe ngacmimeve për të garantuar sigurinë e qytetarëve.
