Reshje e dëborës kanë përfshirë gjithë juglindjen e vendit duke shkaktuar probleme përsa i përket qarkullimit në zonat e thella malore si dhe ndërprerje të energjisë elektrike.
Firmat kontraktore kanë punuar gjatë gjithë natës duke mbajtur të hapura të gjitha akset rrugore nacionale përfshi ato Qafë Thanë – Kapshticë.
Kalimi pa probleme bëhet edhe në rrugët e fshatrave turistike të Dardhës, Voskopojës, Vithkuqit si dhe akset rrugore Zemblak – Goricë.
Ndërmarrjet e shërbimeve të bashkive të juglindjes së vendit po punojnë për normalizimin e situatës në rrugët që lidhin zonat urbane me qendrat e njësive administrative.
Nga ana tjetër, 13 grupe të OSSHE janë duke punuar për normalizimin e situatës së krijuar në gjithë zonat me probleme mbrëmjen e djeshme.
Burime zyrtare pranë degës së OSSHE thanë se po punohet për rikthimin e energjisë në 12 fshatrat e njësisë administrative Proptisht në Bashkinë e Pogradecit.
Policia e qarkullimit rrugor u kërkon drejtuesve të mjeteve të përdorin goma dimërore në zonat malore.
