Në mbledhjen e radhës të zhvilluar nga Këshilli i Qarkut Korçë është miratuar protokolli i bashkëpunimit me Agjencinë Turke për Bashkëpunim dhe Koordinim – TIKA, i cili synon mbështetjen e zhvillimit në fushën e teknologjisë së informacionit.
Ky bashkëpunim do të konkretizohet në Universitetin “Fan Noli” të Korçës, duke forcuar kapacitetet teknologjike dhe infrastrukturën digjitale të kësaj njësie të arsimit të lartë. Në fokus është modernizimi i mjediseve të mësimdhënies dhe krijimi i mundësive më të mira për studentët në fushën e IT-së.
Erjon Nexhipi, Kryetar i Këshillit të Qarkut Korçë, theksoi rëndësinë e vazhdimit të projekteve të përbashkëta me TIKA-n, duke kujtuar edhe bashkëpunimin e suksesshëm të vitit të kaluar për mbështetjen e sektorit të bletarisë në qark.
Ky protokoll i ri është një tjetër hap konkret në drejtim të zhvillimit rajonal dhe fuqizimit të arsimit profesional dhe universitar në Korçë, duke sjellë më shumë mundësi për të rinjtë dhe komunitetin akademik.
