Në reagimin zyrtar për zgjedhjet parlamentare të 11 majit 2025, Ambasada e Shteteve të Bashkuara të Amerikës në Tiranë shprehu urimet për popullin shqiptar dhe theksoi vijimin e partneritetit me Shqipërinë. Por, ndryshe nga viti 2021, këtë herë nuk pati asnjë përmendje për opozitën.
Mesazhi i Ambasadës së SHBA për zgjedhjet 2025:
“Urojmë popullin e Shqipërisë për zgjedhjet parlamentare dhe presim të vazhdojmë partneritetin tonë të ngushtë me Shqipërinë.”
Ky qëndrim përfaqëson një dallim të qartë nga mesazhi i vitit 2021, kur Ambasada e SHBA jo vetëm që përgëzoi fituesin, Edi Ramën dhe Partinë Socialiste, por gjithashtu vlerësoi publikisht opozitën dhe kryetarin e atëhershëm të PD, Lulzim Basha, për një fushatë të fortë e frymëzuese.
Mesazhi i Ambasadës së SHBA për zgjedhjet e 25 prillit 2021:
“Përgëzojmë kryeministrin Edi Rama dhe Partinë Socialiste për fitoren e tyre elektorale. Ne gjithashtu përgëzojmë dhe kryetarin e PD, Lulzim Basha, për udhëheqjen e një fushate të fortë, që i dha zë shumëkujt dhe frymëzoi shpresë. Më e rëndësishmja, ne përgëzojmë popullin shqiptar, i cili foli qartë.”
Përmes heshtjes së saj ndaj opozitës në vitin 2025, Uashingtoni ka dhënë një sinjal diplomatik domethënës. Pavarësisht lobimit të vazhdueshëm të Sali Berishës dhe përpjekjeve të tij për legjitimim ndërkombëtar, SHBA nuk ka ndryshuar qëndrim.
Ish-kryeministri i shpallur “non grata” vazhdon të mos gëzojë asnjë mbështetje nga partneri më i rëndësishëm strategjik i Shqipërisë. Kjo mungesë përmendjeje nuk është rastësore, por një vijimësi e qartë e qëndrimit amerikan se Berisha është një pengesë për opozitën shqiptare dhe për rrugën euroatlantike të vendit.
Ai u kthye në krye të saj pas një beteje të gjatë të kamufluar si një luftë për demokratizimin e PD dhe sovranizmin e kësaj partie. Por të gjitha këto kauza ai i harroi duke mos maskuar më interesat e tij për ta përdorur partinë si mburojë për veten dhe për të lobuar për fatin e tij.
Demokracia e brendshme nuk ekziston në PD-në e tkurrur që drejton, primaret u u kthyen në një farsë, sovranizmi i la vendin lobimeve me shifra të frikshme për heqjen e non gratës. Tani, me një rezultat dëshpërues në krahasim me atë të Lulzim Bashës në 2021-shin, Berisha humbi dhe alibinë e fundit në raport me demokratët, atë të rivlersimit të figurës së tij nga SHBA.
Me përshëndetjen e zgjedhjeve nga SHBA, demokratëve u ka mbetur vetëm fatura e shtrenjtë e lobimeve që prodhuan vetëm propagandë.
Lufta personale e Berishës, që i dha atij karrigen më të lartë në PD, shkatërroi shpresën e demokratëve për të sfiduar Ramën, që ka te Berisha kundërshtarin më komod në spektrin opozitar.
Kjo situatë ngre pyetje serioze për të ardhmen e opozitës: a mund të rizgjohet si një alternativë serioze pa u çliruar nga hijet e së shkuarës? Në vitin 2021, SHBA shihte te opozita shpresë dhe potencial. Në vitin 2025, shpresa mungon. Dhe kjo nuk është thjesht çështje retorike, është reflektim i realitetit.
