Bishnica është vetëm një nga fshatrat e shumtë të Mokrës që ka potenciale të mëdha për zhvillimin e turizmit malor dhe agro turizmit.
Fshatit i ka falur natyra dhe Zoti shumë, ka një bukuri përrallore natyrore, liqene akullnajorë, bimëso halore, shpella dhe mbi të gjitha banorë mikpritës. Por i mungon vetëm diçka, infrastruktura e mirë rrugore për të zhvilluar turizmin.
Nga Proptishti deri në Bishnicë janë 18 km rrugë e cila lidh shumë fshatra, por pas shumë fshatrave të bukur ajo ndalet në Bishnicën përrallore.
Dikur Bishnica ka pasur me qindra familje, kjo edhe për faktin sepse ka pasur një nga sektorët më të mëdhenj të prodhimit të trupave, aty kanë punuar me qindra inxhinerë pyjesh nga gjithë shqipëria, të cilët kanë kujtime të bukura nga ajo kohë, puna, jeta artistike, mbrëmjet e vallëzimit etj.
Sot nuk ka shumë familje, shumica kanë ikur për një jetë më të .irë dhe fshati është pothuajse bosh, por diçka e ruan me fanatizëm, bukurinë që ka.
Panorama që të ofrohet sa zbret për në fshat nuk ka të paguar, njerzit të buzëqeshin, do mbushesh me oksigjen dhe do pish ujë të ftohtë brisk.
Pasi të qëndrosh në fshat, do kesh mundësinë të eksplorosh
Liqenet akullnajorë të Lukovës.
Shpellëm e Ariut.
Liqenin e Frangovishtës.
Gurin e Gjemthit ku rri dëbora deri në maj.
Pyjet e mrekullueshme me bredha dhe aishte.
Janë kaq shumë zona të mbledhura bashkë në një vend, kaq shumë destinacione që do të të mbajmë 3-4 ditë atje.
Tek tuk kanë nisur të ngrihen bujtina familjare, por nuk mjafton, duhet më shumë dhe kryesorja është rruga.
Banorët të thonë se turistët nuk mungojnë.
“Vijnë me motorra dhe xhipa, gjermanë, polakë, çekë, hollandezë e shumë të tjerë. Mahniten me gjithçka, ka prej tyre edhe që kthehen sërish”
“Hall të madh kemi vetëm rrugën, po të kishim atë shumë do ktheheshin dhe do hapnin biznese. Shyqyr që nuk sëmuremi jemi të fortë nga natyra se duhet të vuash deri sa të shkosh në qytet”
Kolibri.al u interesua pranë Bashkisë Pogradec në lidhje me rrugën, na konfirmuan atë që thanë banorët, rruga është problem. Është gati projekti Proptisht-Bishnicë dhe me unazë drejt Buzaishtës, por ka kosto të lartë për buxhet si ai i bashkisë, e kanë aplikuar në qeveri dhe kanë marrë sigurinë se do financohet dhe janë në pritje.
Bishnica e meriton, banorët e saj e meritojnë ashtui si Slabinja, Velçani , Buzaishta etj përfundon bashkia.
Dardha dhe Voskopoja pothuajse u boshatisën deri para pak vitesh, u investua në rrugë dhe sot janë më të vizituarit, kaq do edhe Bishnica, një rrugë e cila do të ishte rruga e shpëtimit, ndryshimit dhe zhvillimit për të gjithë Mokrën.
