Policia e Korçës ka finalizuar me sukses operacionin policor të koduar “Porta”, që kishte si qëllim goditjen e veprimtarisë kriminale të shpërndarjes së lëndëve narkotike në doza të vogla. Si rezultat, u arrestuan në flagrancë dy shtetas të përfshirë në këtë veprimtari.
Në pranga ranë shtetasit A. B., 35 vjeç, banues në Korçë, i cili ndodhej në masën e sigurisë “Arrest në shtëpi” për veprën penale “Prodhimi dhe shitja e narkotikëve”, si dhe T. Gj., 31 vjeç, banues në fshatin Bulgarec, me masën e sigurisë “Detyrim paraqitjeje”, për veprën penale “Mashtrimi kompjuterik”.
Sipas hetimeve, 35-vjeçari përgatiste dozat e kanabisit në banesën e tij, ndërsa bashkëpunëtori i tij, 31-vjeçari, i shpërndante ato në qytetin e Korçës. T. Gj. u kap në flagrancë në lagjen nr. 18, Korçë, teksa kishte marrë dozat nga A. B., me qëllim shitjen e tyre.
Gjatë kontrolleve të ushtruara, u sekuestruan sasi të lëndës së dyshuar narkotike kanabis, si në banesën e A. B., ashtu edhe gjatë kontrollit fizik ndaj T. Gj.
Operacioni u zhvillua nga specialistët e Seksionit për Hetimin e Narkotikëve të DVP Korçë, në bashkëpunim me Forcën e Posaçme “Shqiponja”, pas informacioneve të siguruara nga inteligjenca informative.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme hetimore.
