Në Ditën Ndërkombëtare të Fëmijëve, më 1 Qershor, teatri mijëravjeçar i Butrintit u rikthye në jetë përmes një performance të veçantë nga nxënësit e klasës së 10-të A të gjimnazit “Raqi Qirinxhi” të Korçës. Në kuadër të projektit lëndor dhe programit “Edukimi përmes kulturës”, të rinjtë sollën në skenë tragjedinë e pavdekshme “Medea” të Euripidit, duke kthyer një hapësirë antike në një platformë të gjallë artistike dhe edukative.
Performanca, e zhvilluar në bashkëpunim me Fondacionin për Zhvillimin e Butrintit dhe nën kujdesin e Ministrisë së Ekonomisë, Kulturës dhe Inovacionit, ishte dëshmi e fuqisë së artit për të ndërtuar ura mes brezave dhe epokave. Nxënësit interpretuan me pasion, përkushtim dhe dinjitet, duke i dhënë jetë një vepre klasike përmes një shfaqjeje mbresëlënëse dhe emocionuese.
Ky aktivitet u zhvillua në kuadër të programit “Edukimi përmes kulturës”, një nismë e Ministrisë së Kulturës, që synon të integrojë përvojat kulturore në procesin mësimor, duke ofruar një formë të re të të nxënit për të rinjtë shqiptarë.
Instituti Kombëtar i Trashëgimisë Kulturore dhe The AADF ishin gjithashtu partnerë në këtë nismë, që shërben si një model frymëzues për fuqizimin e edukimit nëpërmjet përvojave të drejtpërdrejta me trashëgiminë kulturore.
Një falënderim i veçantë i shkon nxënësve për angazhimin, seriozitetin dhe entuziazmin, si dhe mësuesit Rezar Naco për udhëheqjen profesionale dhe mbështetjen e pandërprerë.
