Klement Vesho nga Pogradeci i është përkushtuar prej 28 vitesh mbarështimit dhe garave me pëllumba, duke e kthyer këtë veprimtari në një stil jetese. Pasioni i tij nisi pas viteve të para të demokracisë dhe sot zë vendin kryesor në përditshmërinë e tij.
Për të mbështetur këtë sport, Vesho tregon se ka hequr dorë nga zakone të tjera vetjake. “Unë i vura detyrë vetes. Këtu 28 vjet para e lashë edhe cigaren, edhe shollin në klube, e thashë këto paratë që do prish nëpër bilardo, do t’ia kushtoj pëllumbave. Unë të ngrihem në mëngjes, laj sytë dhe direkt te pëllumbat i shikoj njëherë aty. Nuk i heq pëllumbat. Ata janë adrenalina ime”, shprehet ai.
Gjatë viteve, pogradecari ka fituar dhjetëra kupa në garat e organizuara nga federata. Një nga rezultatet më të spikatura të arritura prej tij mbetet ai i një pëllumbi që përshkoi një distancë prej rreth 1500 kilometrash vijë ajrore nga Berlini në Pogradec.
Megjithatë, ky sport mbart kosto të larta financiare për ushqimin, vitaminat dhe pëatitjen, të cilat shkojnë deri në disa mijëra euro në vit. Sipas Veshos, mungesa e mbështetjes institucionale në vend e bën edhe më të vështirë këtë angazhim, krahasuar me vendet fqinje.
