Zhvillimi i bujqësisë moderne po merr një tjetër dimension në qarkun e Korçës, me vendosjen e tre stacioneve të sistemit Sinjal-Prognozë “RIMPRO”, të cilat do të ndihmojnë në parandalimin e sëmundjeve dhe dëmtuesve të kulturave bujqësore.
Stacionet janë vendosur konkretisht në:
• Parcelën e fermerit Muharrem Selimi, në Mollaj
• Pemtoren e Lorenc Muasa, në Progër
• Sipërfaqen bujqësore të Petro Thanasi, në Zvirinë
Këto pika përfshijnë një rreze 5 km me vijë ajrore, duke përfshirë një zonë të konsiderueshme me potencial të lartë bujqësor.
Monitorimi i të dhënave do të kryhet nga specialistët e AREB Korçë (SEB Korçë) dhe QTTB Korçë, në bashkëpunim me GIZ Albania, për të analizuar sinjalet dhe për të ndihmuar fermerët që të marrin masa në kohë reale, duke reduktuar përdorimin e pesticideve dhe duke shmangur humbjet ekonomike.
Ky projekt përfaqëson një hap të rëndësishëm drejt bujqësisë së qëndrueshme dhe të digjitalizuar, ku teknologjia vihet në shërbim të prodhimit më cilësor dhe më të sigurt për konsumatorin dhe natyrën.
