Në qytetin e Maliqit ka nisur një aksion i rëndësishëm nga Bashkia për sistemimin dhe largimin e kabllove të telefonisë, internetit dhe sistemit kabllor që konsiderohen të panevojshme. Aksioni po zhvillohet fillimisht në gjashtë rrugë ku po kryhet rikonstruksioni, ndërsa më pas pritet të shtrihet në të gjithë territorin e qytetit.
Nënkryetari i Bashkisë Maliq, Eridjon Rustemi, u ka bërë thirrje të gjithë operatorëve të shërbimeve të veprojnë sa më shpejt për të hequr kabllot që nuk përdoren më, në mënyrë që qytetit t’i kthehet një pamje më e rregullt dhe estetike. Ai theksoi se në rast mungese bashkëpunimi, Bashkia është e gatshme të ndërhyjë me specialistët e saj për të prerë kabllot dhe për të garantuar rregullsinë në të gjithë territorin.
“Kompanitë kanë nisur nga puna dhe ne do të vazhdojmë deri në normalizimin e plotë të situatës,” – deklaroi Rustemi.
Ky aksion është pjesë e një plani më të gjerë për të përmirësuar infrastrukturën urbane dhe për t’i dhënë Maliqit më shumë hapësirë dhe hijeshi.
