Gjykata e Korçës ka dhënë vendimin për rastin e 21-vjeçarit Dritson Kurti, i cili u arrestua rreth nëntë muaj më parë me akuzën e “marrëdhënie seksuale me të mitur”. Pas shqyrtimit të çështjes, trupa gjykuese ka vendosur që i riu të dënohet me 5 vite shërbim prove.
Dritson Kurti, i cili vjen nga komuniteti rom, jeton prej kohësh me bashkëjetuesen e tij, e cila sipas aktit të akuzës ishte nën moshën madhore në momentin e bashkëjetesës. Lidhja e tyre është konsideruar si një martesë tradicionale brenda komunitetit, një praktikë e njohur në zonat ku jetojnë pjesëtarë të këtij komuniteti.
Fillimisht, Prokuroria e Korçës ngriti ndaj të riut një akuzë që parashikonte një dënim maksimal deri në 25 vite burg. Megjithatë, gjatë hetimeve dhe në fazën e shqyrtimit gjyqësor, vepra penale u rivlerësua dhe u rikualifikua, çka çoi në uljen e masës së dënimit.
Vendimi i gjykatës parashikon që gjatë pesë viteve të shërbimit prove, Dritson Kurti nuk duhet të kryejë asnjë vepër penale. Nëse ai shkel këtë detyrim, rrezikon të përballet sërish me drejtësinë dhe të vuajë dënimin e pezulluar.
Lirimi nga qelia është pritur me emocione nga familjarët e të riut, përfshirë bashkëshorten dhe gjyshen e tij, të cilat e kanë mbështetur gjatë gjithë procesit.
