Klubi Shumësportësh Skënderbeu ka kënaqësinë të konfirmojë zyrtarisht rinovimin e bashkëpunimit me trajnerin Arben Prifti, i cili do të vijojë të drejtojë ekipin e volejbollit të meshkujve edhe për sezonin sportiv 2025.
Pas një sezoni të jashtëzakonshëm ku skuadra u shpall nënkampione e Shqipërisë, trajneri Prifti ka dëshmuar lidership, profesionalizëm dhe një vizion të qartë për të ardhmen. Nën drejtimin e tij, ekipi ka zhvilluar një identitet të fortë garues, disiplinë dhe një frymë të qëndrueshme grupi.
Fokusi për sezonin e ri do të jetë zhvillimi i mëtejshëm i elementit vendas – lojtarëve korçarë – të cilët përbëjnë zemrën e këtij ekipi. Ky është jo vetëm një vendim strategjik, por edhe një angazhim ndaj vlerave lokale që e kanë bërë Skënderbeun një emër të respektuar në sportin shqiptar.
Me mbështetjen e pandalshme të tifozëve tanë dhe komunitetit sportiv të qytetit, synojmë të ndërtojmë mbi arritjet ekzistuese dhe të synojmë majat e kampionatit!
Skënderbeu nuk është vetëm një klub – është Korça, është pasion, është krenari!
