Dardha, një nga perlat e turizmit malor në juglindje të vendit, po përfiton një sërë ndërhyrjesh të rëndësishme që synojnë përmirësimin e infrastrukturës dhe zgjerimin e ofertës turistike. Në kuadër të këtyre investimeve, rruga hyrëse e fshatit po shtrohet me asfalt në një sipërfaqe prej 5000 m², ndërkohë që në qendër po rivendoset kalldrëmi tradicional në një sipërfaqe prej 1400 m², për të ruajtur identitetin dhe autenticitetin e zonës.
Këto punime realizohen nga Bashkia e Korçës në bashkëpunim me Fondin Shqiptar të Zhvillimit dhe pritet të përmirësojnë ndjeshëm qarkullimin, veçanërisht gjatë stinës së dimrit, duke e bërë fshatin më të aksesueshëm për vizitorët.
Paralelisht me këto ndërhyrje infrastrukturore, janë planifikuar edhe disa projekte të reja turistike që do t’i japin një tjetër dimension zhvillimit të Dardhës. Bashkia e Korçës, në bashkëpunim me donatorë vendas dhe ndërkombëtarë, ka siguruar financimin për rikonstruksionin e godinës së pleqësisë së fshatit, një projekt që do të realizohet me fondet IPA të Bashkimit Europian.
Gjithashtu, në bashkëpunim me Fondin Shqiptar të Zhvillimit do të ndërtohet një zip line dhe do të krijohen disa shtigje të reja turistike, duke shtuar aktivitetet argëtuese për vizitorët që zgjedhin Dardhën si destinacion gjatë gjithë vitit. Këto projekte synojnë të forcojnë profilin turistik të fshatit, duke ofruar më shumë shërbime dhe eksperienca për turistët vendas dhe të huaj.
Këto i ka bërë të ditura kryetari i Bashkisë së Korçës, Sotiraq Filo, gjatë inspektimit të punimeve, ku ka theksuar se Dardha është një destinacion i konsoliduar turistik, i cili tashmë do të ketë edhe më shumë potencial për të pritur vizitorë me shërbime moderne dhe një ofertë të pasuruar me aktivitete në natyrë.
