Drejtoria Vendore e Policisë Korçë bën me dije disa ngjarje të ndodhura së fundmi në territorin e saj.
Specialistët e Qarkullimit Rrugor arrestuan në flagrancë shtetasin I. C., 46 vjeç, banues në Korçë, pasi u kap duke drejtuar mjetin në gjendje të dehur.
Ndërkohë, ka nisur procedimi penal për shtetasit L. O., 21 vjeç, dhe A. X., 54 vjeç, të përfshirë në një aksident rrugor në fshatin Blacë. Si pasojë e përplasjes së automjeteve të tyre, ka mbetur i dëmtuar lehtë shtetasi A. X.
Në Maliq, nisi procedimi penal për shtetasit T. H., 43 vjeç, dhe A. M., 59 vjeç, të cilët dyshohet se janë konfliktuar për motive të dobëta.
Po ashtu, në fshatin Vithkuq, një lokal në pronësi të shtetases A. Sh. u përfshi nga flakët, ku dyshohet se shkak u bë një shkëndijë elektrike. Zjarri shkaktoi vetëm dëme materiale.
Në fshatin Gorricë e Madhe të Pustecit, ka rënë zjarr në një sipërfaqe toke me bimësi në pronësi të shtetasit M. Gj., 71 vjeç. Po hetohet për shkaqet e ngjarjes.
Një tjetër rast zjarri është shënuar në orët e para të mëngjesit, pranë pikës kufitare Qafë Thanë, ku automjeti me drejtues A. K. ka marrë flakë në ecje dhe është djegur plotësisht.
Materialet procedurale për të gjitha rastet i janë referuar Prokurorisë për veprime të mëtejshme. Grupi hetimor vijon punën për sqarimin e plotë të ngjarjeve.
