Pas disa reagimeve në rrjet mbi pretendime për prishjen, lënien në harresë apo tjetërsimin e godinës së Bibliotekës së Fëmijëve “Thoma Turtulli” në Korçë, kryetari i Bashkisë, Sotiraq Filo, ka reaguar publikisht duke sqaruar se objekti nuk do të prishet, por po i nënshtrohet një procesi të plotë restaurimi dhe rivitalizimi.
“Po fillon rikonstruksioni i plotë dhe rivitalizimi i Bibliotekës së Fëmijëve, e dhuruar qytetit nga filantropi Thoma Turtulli, një nga objektet më të rëndësishme të Korçës për sa i përket kujtesës historike dhe vlerave arkitekturore që mbart si objekt unikal dhe i realizuar me shumë dashuri e kujdes nga mjeshtrit e kohës,” – shprehet Filo në postimin e tij.
Ai sqaron se ky është restaurimi i parë i këtij lloji që nga ndërtimi i bibliotekës. Projekti është hartuar nga Bashkia Korçë me bashkëpunimin e specialistëve të restaurimit dhe ka marrë miratimin e Këshillit Kombëtar të Trashëgimisë Kulturore, sipas legjislacionit në fuqi.
“Restaurimi synon të nxjerrë në pah vlerat e degraduara në vite, si dhe të krijojë një ambient komod sipas normativave, pa ndryshuar funksionin aktual. Do t’i shërbejë sipas vullnetit të dhuruesit Thoma Turtulli fëmijëve, duke ndërthurur leximin e librit tradicional me elementet e teknologjisë dhe inovacionit,” – shton kryebashkiaku.
Objekti ndodhet aktualisht në fazën e përgatitjes së kantierit për nisjen e punimeve ndërtimore, ndërsa ka filluar restaurimi i disa elementeve identitarë, si portoni hyrës.
Filo shprehet i bindur se projekti do të ruajë qëllimin për të cilin biblioteka u ndërtua: “Pres me padurim që, pasi projekti të përfundojë, mbi 600 fëmijë të moshës deri në 15 vjeç, frekuentues të kurseve të teknologjisë dhe inovacionit, së bashku me qindra bashkëmoshatarë të tyre, frekuentues të librit, të kenë një ambient komod dhe dinjitoz dhe që amaneti i Thoma Turtullit, për një rini larg kafeneve dhe pranë dijes, të vazhdojë të përmbushet në përjetësi.”
Ky projekt pritet të ruajë karakterin historik dhe arkitekturor të ndërtesës, duke i dhënë qytetit një hapësirë moderne, por të mbështetur në trashëgiminë kulturore, në shërbim të brezave të rinj.
