Në seancën e fundit të legjislaturës 4-vjeçare të Kuvendit të Shqipërisë, Kryetari i Grupit Parlamentar të Partisë Socialiste, Niko Peleshi, ka reaguar ashpër ndaj gjuhës së përdorur nga deputetët e opozitës, duke e cilësuar atë si të papërshtatshme dhe fyese.
“Te performanca dhe kalimi i kufijve të etikës parlamentare, me sharje, baltë, akuza e fjalor të papërshtatshëm, duam apo nuk duam ne të mazhorancës, në fund përgjegjësinë e mbajmë edhe ne mbi supe. Kur në ditën e fundit të një legjislature, kur edhe nëse zemra nuk ta thotë, zemra bëhet gur dhe thua disa fjalë të mira për njëri-tjetrin, për punën e përbashkët që kemi bërë, për më shumë se 520 ligje të miratuara së bashku, për afro 200 marrëveshje ndërkombëtare ku edhe opozita ka dhënë votën e saj, për 18 ligje me shumicë të cilësuar ku gjithashtu opozita ka kontribuar, në vend të këtyre fjalëve, dëgjohen fjalë që nuk meritojnë të thuhen në këtë sallë”, tha Peleshi.
Ai shtoi se opozita ka përdorur etiketime si “çingije”, “sulltanë”, apo se të gjithë deputetët janë “të vënë në rresht”, gjuhë që, sipas tij, është fyerje jo vetëm për përfaqësuesit e mazhorancës, por edhe për qytetarët shqiptarë.
“Nëse ti i quan të gjithë të vënë në rresht, përfaqësuesit e popullit shqiptar, atëherë praktikisht ke shpalur gjithë popullin shqiptar si në rresht. Dhe kjo është fyerje e rëndë. E thatë vetë pak më parë: ‘T’ju vijë turp që keni zgjedhur këta përfaqësues’. Pra, shpallët me turp gjithë popullin shqiptar”, theksoi Peleshi.
Po ashtu edhe përmes një postimi në rrjete sociale, Peleshi ka ritheksuar qëndrimin e Grupit Parlamentar të Partisë Socialiste:
️ “Në seancën e fundit të kësaj legjislature, pritshmëria është për reflektim dhe mirënjohje për punën e përbashkët, jo për fyerje dhe etiketime që nuk i shkojnë një deputeti të Kuvendit të Shqipërisë. Në emër të Grupit Parlamentar të Partisë Socialiste, distancohemi me forcë nga një gjuhë që fyen jo vetëm kolegët, por edhe qytetarët që na kanë zgjedhur me afro një milion vota. Kjo nuk është kultura jonë. Ne nuk i përkasim kësaj gjuhe. Politika duhet të jetë shërbim dhe përgjegjësi, jo baltë!”, shkruan Peleshi.
