Trupa e Cirkut Kombëtar ndaloi në Pogradec, duke i dhuruar qytetit një mbrëmje të mbushur me emocion, ngjyra dhe argëtim në sheshin “Odeon”. Shfaqja solli në skenë një kombinim të performancave klasike dhe moderne, me numra të ekuilibrit, xhonglimit dhe akrobacisë që mbajtën të gozhduar publikun, veçanërisht fëmijët që u përfshinë aktivisht në spektakël.
Energjia e interpretuesve, muzika dinamike dhe përfshirja e të vegjëlve në disa nga numrat e cirkut krijuan një atmosferë të ngrohtë dhe festive. Artistët, si profesionistët ashtu edhe të rinjtë që po stërviten në këtë disiplinë, sollën një shfaqje tërheqëse, duke dëshmuar se cirku mbetet ende një formë magjike arti që bashkon breza të ndryshëm.
Me këtë ndalesë në Pogradec, Cirku Kombëtar vijon turin e tij artistik në qytetet shqiptare, si pjesë e aktiviteteve kulturore të verës, duke sjellë pranë komuniteteve emocione pozitive dhe art skenik në formatin më të gëzueshëm.
