MIK Festival 2025, që do startojë më 10 korrik, do vijojë rrugëtimin artistik me natën e dytë të programit të tij kulturor. Më 11 korrik, në orën 20:00, Teatri “Andon Zako Çajupi” në Korçë do të presë një mbrëmje të veçantë muzikore, dedikuar një prej emrave më të shquar të skenës lirike shqiptare, Gaqo Çako, në kuadër të 90-vjetorit të lindjes së tij.
Koncerti-homazh do të prezantohet nga sopranoja e njohur Inva Mula, ndërsa në skenë do të ngjiten artistë të njohur si Tatjana Kora Elmazi, Kastriot Tusha, Gjergji Mani, Xhoiden Dervishi dhe i ftuari special Tchako. Atmosferën do ta kurorëzojë Orkestra Simfonike e Forcave të Armatosura, nën drejtimin e dirigjentit të njohur Eno Koço.
Ky aktivitet pritet të sjellë emocione të forta për publikun korçar dhe vizitorët, duke vulosur edhe njëherë statusin e Korçës si një vatër e rëndësishme e kulturës dhe e artit shqiptar.
