Nata e dytë e MIK Festival 2025 solli një mbrëmje të paharrueshme, kushtuar një prej zërave më të mëdhenj që ka njohur muzika shqiptare, Gaqo Çako.
Në 90-vjetorin e lindjes së tij, Korça nderoi me dinjitet dhe krenari trashëgiminë e këtij emri të pavdekshëm të artit lirik, duke mbushur skenën e Teatrit “Andon Zako Çajupi” me emocione dhe ovacione.
Nën drejtimin e mjeshtrit Eno Koço, Orkestra Simfonike e Forcave të Armatosura, së bashku me emra të njohur të skenës shqiptare si Tatjana Kora Elmazi, Kastriot Tusha, Gjergji Mani, Xhoiden Dervishi dhe i ftuari special Tchako, interpretuan një repertor të pasur që kujtoi figurën dhe kontributin e jashtëzakonshëm të Çakos në muzikën shqiptare.
Mbrëmja u moderua me finesë nga sopranoja e njohur Inva Mula, e cila i dha edhe më shumë madhështi këtij homazhi artistik, duke e kthyer koncertin në një udhëtim emocional mes kujtimesh dhe tingujsh të mrekullueshëm.
Korça, me këtë aktivitet, dëshmoi edhe një herë se është dhe do të mbetet një nga qendrat më të rëndësishme të kulturës shqiptare.
