Në Sesionin e 47-të të Komitetit të Trashëgimisë Botërore të UNESCO-s, Shqipëria paraqiti progresin e arritur në mbrojtjen dhe menaxhimin e pasurive të saj në Listën e Trashëgimisë Botërore, me një vëmendje të veçantë për Rajonin e Liqenit të Ohrit.
Ministri i Ekonomisë, Kulturës dhe Inovacionit, Blendi Gonxhja, bëri të ditur se Komiteti miratoi projekt-vendime që njohin përparimin e Shqipërisë në administrimin dhe zhvillimin e qëndrueshëm të kësaj pasurie ndërkufitare me Maqedoninë e Veriut.
Sipas Gonxhes, që nga përfshirja e pjesës shqiptare të Liqenit të Ohrit në Listën e Trashëgimisë Botërore në vitin 2019, janë shënuar arritje të rëndësishme në ruajtjen dhe planifikimin e zonës, pavarësisht sfidave të trashëguara, sidomos në aspektin mjedisor. Ai theksoi rëndësinë e bashkëpunimit ndërkufitar dhe koordinimit institucional mes dy vendeve fqinje, duke theksuar se aspektet kulturore të rajonit kanë njohur një rivlerësim dhe ruajtje më efikase.
“Vendimet e UNESCO-s janë një mesazh inkurajimi dhe një mirënjohje publike për të gjithë ata që kontribuojnë çdo ditë në këtë mision të përbashkët,” u shpreh ministri Gonxhja.
Rajoni i Liqenit të Ohrit mbetet një pasuri me vlera të veçanta natyrore dhe kulturore, ndërsa autoritetet shqiptare janë të angazhuara për të balancuar zhvillimin turistik me mbrojtjen e tij afatgjatë.
